Demo

La nada y tú

Letras del disco

La Povisa

Apandome ´l mirar

de los tos güeyos

y na cercia d´agostu

los recuerdos

del que fuera un día monte,

biesca y cielu

onde dir cabalgar

na clin del vientu.

 

Apandome´l burbús

de la to risa

y na bluma d´abril

tola mio ardicia

al besar el llugar

d´alborecida

onde envede´l to cuerpu

la povisa.

 

Coles piernes tremando,

la voz fuxida,

palpo adulces

el tastu de la espina

Alón

Llevánteste cola aurora,

cola aurora t´acostasti,

aprovécente les hores,

el suañu nun vien buscate.

 

Esconsones y ente´l suelu

topes estielles de alma.

Almuerces cola mirada

esborrá pola alcordanza.

 

Alón los díes de gloria,

los díes en qu´esfrutasti

d´un corazón al par tuyu,

d´un cuerpu onde abellugate

                      

Alón los besos, les rises,

les dunes qu´atravesasti

como un viaxeru d´espluma

pela piel que tanto amasti.

 

Alón el futuru escritu

cola forma les sos manes.

Alón les sorrises ñidies

debuxando llibertaes

Pa la vida

Pa la vida nun quiero otru equipaxe

que l´aliendu encendiéndome la sangre

y la bluma escondiendo los mios suaños

 

acullá de la sienda de los suaños.

Nun me faen falta más qu´estes dos manes,

tengo´l vientu xiblando nes vidayes,

 

fixe lluz col rellumu los tos llabios

y esbillé del to cuerpu los raigaños.

Nun necesito alpenes provisiones,

una o dos alcordances señaldoses

 

y una mano que suaña primaveres

pela sienda onde tú siempre m´esperes.

Que más dá si´l copitu d´esti viaxe

ye la mar, onde naide va esperame.

 

Si t´alcuentro dacuando nos regatos

nun m´importen un res tantos escayos.

Cuando yo te tenía

Cuando yo te tenía

y yera too estremao

la nueche yera vino

y yera roses.

 

Mirábesme callau

y yo entendía´l to silenciu.

Cuando yo te tenía

y yera too estremao...

 

Ensin querer yo queríate,

tú queríasme en silenciu.

Ensin cuerpu y con ánima

dite´l besu que mos robó´l tiempu

 

Agora ya nun m´ames

nun te pierdes nos mios besos.

Nun me garres de la mano

nin m´enseñes nueos versos.

 

La nada y tú

Cuando por ti venga la muerte

vendrá de la to mano, ciega,

guiándo-y los pasos un feble dolor.

 

Será como vistir de fiesta,

paxellu nuevu de domingo

que nun serás a quitar ya

 

Verás un rostru nel espeyu,

solombra escuro de la muerte,

y tú nun vas saber quién ye.

 

Nada habrá ente la nada y tu.

 

Anuncia un tiempu de derrota.

Pa qué preguntes, nun apielles

que naide habrá que te respuenda.

 

Mañana vas salir tan ceu

que nun oirás la voz de l´alba

que grita, llama y te xuxuria.

 

Mañana vas salir tan ceu

que nun oirás la voz de l´alba

que llora por ti y t´apodera

 

Nada habrá ente la nada y tu

Muerte natural

Morrer como´l cigarru

col mio calor hacia ti.

Morrer como´l merucu

que muerre matando´l pexe

 

Morrer como l´orgasmu

enzarráu dientro de ti

Morrer como´l disparu

qu´españa nel aire ayeno.

 

Con una muerte natural

como´l neñu

que depende a tirar

puñaos de besos

pa ti

Como l´azul al cielu

Y vuelvo

a buscate nos suaños,

faesme falta

como arena al desiertu,

como al monte la lluvia,

como l´azul al cielu,

como al barcu la vela.

 

Lo mesmo

que la ñeve al hibiernu,

lo mesmo,

lo mesmo,

lo mesmo yes pa min.

 

Dacuando alzo los güeyos

y miro, y veo la vida

pero fáltesme tu

pa sentir y vivila.

 

Esmigayo les hores,

ya nun m´importa el tiempu.

Desque tás n´otros llabios

la vida nun la quiero

 

Lo mesmo,

lo mesmo,

lo mesmo yes pa min.

Quédate´l vueltu

Nun me vengas agora,

nun me vengas agora...

 

Nun me vengas agora

cola refugaya del amor.

 

Palabres guapes y amistá,

un cuellu onde llorar,

toes eses coses...

Págame amor, con sólo amor

y si non, quédate´l vueltu

 

Nun me vengas agora,

nun me vengas agora

con palabres guapes y amistá,

un cuellu onde llorar,

toes eses coses...

                     

la moneda suelto que te fue

quedando en bolsu...

pa min, qu´hubi querete hasta´l deliriu

cuento yo, nun la merezo.

Si muerro antes que tú

Si muerro antes que tu,

cosa que ye bien probable,

nun m´entierres en sagrao

nin pongas llutu.

 

Si muerro antes que tu

nun me llores, bien que sabes

que nun fui lo que nun soi:

bonu ni amable.

 

Alpenes soi

el que llambe l´aire per onde pases,

sable que s´esmuz ente les tos manes.

 

Pa ser eso,

tar vivu nun fai falta

 

Si muerro antes que tu

nun teas triste ni ablayada.

Nun tien méritu esperar

por un cobarde.

 

Si muerro antes que tu

nun me llores, bien que sabes

que nun fui lo que nun soi:

bonu ni amable.

Nu voi mirar p´atrás

Nun voi mirar p’atrás esta nueche,

nun voi mirar p´atrás esta nueche.

Prometo que cada minutu

va ser un suicidiu.

Nun voi mirar p´atrás esta nueche.

 

Prometo que cuando torne a casa,

al amanecerín, galdíu, sin un

res qu’ufierta-y a la rosada y

arrecendiendo a muertes ayenes,

mientres el sol señala, risón,

les firíes, la llaceria de la nueche

 

nun voi mirar p’atrás,

nun voi sentir un precipiciu nes coraes,

nun voi mirar p´atrás esta nueche.

 

Prometo qu’esta nueche

voi faceme nueche

y voi rime de tolos que miráis p’atrás

en cuantes qu’atapez.